我好鍾意黎導演所設計既「冥河」！ 真係估唔到導演會設計一場關於冥河既橋段，我覺得導演真係好有創意，竟然諗到係地獄入面加一條冥河，令我對平時幻想中極厭惡既地獄有所改觀……

係冥河入面有場戲講我同Vincy兩個人坐住隻木筏係條冥河中間到飄浮。果場戲我覺得拍得好靚，不過就真係辛苦左幾位「蛙人」工作人員，因為佢地要著住潛水衣，潛落落水拉我地隻木筏游出河中間拍攝，真係辛苦晒佢地。不過宜家諗番個日既情景都覺得好刺激、好好玩。呢場戲令我諗返起細細個同屋企人一齊去遊樂場玩個時，坐係隻船仔上面，係D水上面打圈既情景…… 我諗同我細個係遊樂場玩惟一唔同既就係因為呢場戲上面加左好多既ＣＧ效果。之後睇番剪接師剪番場戲，真係好有「漂流」既感覺，大家係現場睇返PlayBack都好滿意…         

好鍾意同黎導演合作，同佢拍戲係一件好舒服同好開心既事…… 最開心同最難得既係佢肯比我地去「試」，比我地「試」用我地演得最舒服既演繹方法，呢一方面亦係我好欣賞佢既地方之一。佢好肯比空間我地去演，好少Fix我既演繹方法，最多都係我地演既時候可能個情緒、動作唔係好o岩既時候，佢先會以提點，又或者同我商量下點演會最近乎佢自己構思既想法。當我係演繹上遇到有問題既時候，我都會即時問導演。所以其實導演真係好辛苦，除左要兼顧咁多個演員之外，仲要克服現場好多突如其來既突發事件，真係少D心血都唔得。 

所以，黎導演…你係真「意、志、力」驚人……

鍾欣桐 (Gillian)